- A formación que lidera Jeremy Corbyn apoiará a chamada ás urnas se desaparece a posibilidade dun «brexit» sen acordo
Este xoves, o primeiro ministro británico, Boris Johnson, anunciou a súa intención de convocar eleccións xerais anticipadas no Reino Unido o próximo 12 de decembro.
Nunha entrevista coa cadea BBC, o primeiro ministro afirmou que outorgará máis tempo aos deputados para debater o acordo do «brexit», pero só se aceptan apoiar a súa chamada ás urnas.
O primeiro ministro pediu aos partidos opositores que sexan «razoables» e dean luz verde a unhas eleccións nas que o mandatario conservador partiría, segundo as enquisas, como favorito.
A formación que lidera Jeremy Corbyn insistiu nas últimas semanas en que apoiará a chamada ás urnas unha vez desaparecese da mesa a posibilidade dun « brexit» sen acordo.
O éxito dos plans de Johnson pode depender, por tanto, da extensión que conceda Bruxelas á data de saída do Reino Unido da Unión Europea (UE), prevista por agora para o próximo día 31.