A Comisión Europea (CE) propón un embargo gradual do petróleo ruso que suspenda as importacións de cru en seis meses e de produtos refinados para final de ano. Así o anunciou no Parlamento europeo a presidenta da Comisión, Ursula von der Leyen, que presentou este mércores a proposta para o sexto paquete de sancións a Rusia pola guerra de Ucraína. O paquete deberá ser aprobado por unanimidade polos estados membros da Unión Europea (UE), pero polo momento Hungría rexeita esta proposta. A presidenta da Comisión asegura que o embargo de importacións farase de maneira ordenada «para asegurar roteiros de subministración alternativos e minimizar o impacto nos mercados globais». O ministro de Exteriores ucraíno, Dmytro Kuleba, valorou positivamente a nova proposta de sancións, aínda que criticou tanto a fase de transición ata fin de ano como aos países que rexeitan o plan.