Moito que ver en “Buño deMostra” | Achégate


  • A artesanía e a música danse a man durante o mes de agosto e, para todas as actuacións musicais, será preciso ter entrada

Buño comezou este venres a súa particular Mostra de Olaría, que está adaptada á normativa da COVID-19. Ás 19:00 horas, o Ecomuseo Forno do Forte foi testigo da inauguración da mostra dos traballos de diferentes oleiros, unha exposición que poderá visitarse ata finais de agosto.

Promo do evento.

Esta fin de semana e o próximo sábado 8 e domingo 9 de agosto, os oleiros e oleiras farán demostracións na rúa de 12:00 a 13:00 horas e de 17:00 a 18:00 horas. Pero tamén haberá moita música, cos concertos de Mascada e Dj Tristón, que actuarán hoxe sábado ás 19:00 horas no Ecomuseo, e coas actuación de Isaac Peces e Russinha o domingo ás 13:00 horas.

O xoves 6 de agosto haberá un pasarrúas de música tradicional con Arrancadeira ás 19:00 horas, e o venres 7 de agosto, tamén á mesma hora, o pasarrúas correrá á cargo de Malante.

O sábado 8 de agosto, ás 13:00 horas, haberá unha “sesión vermú” baixo Malante e Carcaxía, onde a música tradicional será a protagonista. Ás 19:00 horas, para remate da xornada, o Forno da Costa será escenario do concerto de Ukestra do Medio e Djalminha.

Como colofón, o domingo 9 de agosto celebrarase a ruta de Olaría ‘O ciclo de vida dunha peza’ con Volta Montana e ás 13:00 horas actuarán Monoulious DOP.

Será necesario mercar a entrada para todas as actuacións.