- Os beneficios obtidos pola organización ascenden a máis de 5 millóns de euros
A Policía Nacional e a Garda Civil de España detiveron a unha organización criminal que manipulaba e coaccionaba ás súas vítimas de forma emocional para que exercesen a prostitución en clubs e pisos privados, chegando a obter un beneficio de máis de 5 millóns de euros.
Os axentes liberaron a 13 mulleres explotadas e detiveron a 16 persoas ás que se lles imputan os delitos de trata de seres humanos con fins de explotación sexual, branqueo de capitais e pertenza a organización criminal.
Os membros da banda usaban o método «lover boy», mediante o cal captaban a mulleres de nacionalidade romanesa e facíanlles crer, mediante chantaxes emocionais, que non poderían vivir sen os seus captadores. Despois de ser enganadas, eran trasladadas a varios prostíbulos situados en diferentes países europeos como Italia, Reino Unido, Austria, Suíza, Alemaña, Francia, Holanda e Eslovenia.
Para branquear os seus ingresos ilegais compraban vivendas e vehículos a nome dos seus familiares polo que as actuacións policiais dirixíronse contra todos os chanzos da organización, líderes, mandos intermedios e familiares.
A investigación dividiuse en dúas fases e en total os axentes interviñeron máis de 142.000 euros, así como diversos vehículos de alta gama, varios teléfonos móbiles e diversa documentación.
Debido ao carácter internacional e á complexidade da investigación, nesta tamén traballaron membros da policía italiana e romanesa, así como a Eurojust e a Europol.