- Durante a Semana Santa, data tradicional do festexo deste evento, organizaranse actividades ao aire libre co encaixe como protagonista
O 30º Aniversario da Mostra do Encaixe Deputación da Coruña de Camariñas celebrarase no mes de outubro, entre os días 8 e 12. Despois dunha extensa deliberación e de múltiples conversacións cos sectores que vertebran a economía do municipio, “sería terrible suspender por segundo ano consecutivo a Mostra do Encaixe”, subliñou a alcaldesa, Sandra Ínsua.
“Contemplamos estritas medidas de seguridade e hixiene e controlaremos os aforos de todas as salas”, recalcou a concelleira de Encaixe, Encarna Liñeiro.
Pola súa banda, a directora da Mostra, Dolores Lema, anunciou que “con todo, organizaremos durante a Semana Santa actividades ao aire libre e adaptadas ao contexto sanitario vixente, que terán o encaixe como elemento protagonista”.