- A actuación estará enfocada en protexer ás vivendas da erosión provocada polos factores climáticos
O Concello de Camariñas prepara un novo proxecto para executar a segunda fase do paseo marítimo de Area da Vila, que se enfocará en protexer ás vivendas alí localizadas da erosión provocada polos factores climáticos e o paso do tempo.
A alcaldesa de Camariñas, Sandra Ínsua, acompañada dos concelleiros Sergio Caamaño e Encarna Liñeiro, reuniuse este luns de xeito telemático co subdirector xeral para a Protección da Costa, dependente do Ministerio para la Transición Ecológica y el Reto Demográfico, Ángel Muñoz Cubillo, para dar luz verde á redacción do proxecto.
O obxectivo desta reunión foi sentar as bases dun acordo de colaboración para levar a cabo a segunda fase do Paseo de Area da Vila, correspondente á parte da Punta da Carnicería. Xa existía un proxecto anterior do ano 2010 que pasaba por dominio público, pero actualmente estas intervencións non se realizan polo que a iniciativa resultaba inviable.
Estes traballos completaranse coa primeira fase do proxecto, que vai desde a Punta da Carnicería ata a rúa Vulcano e que se acometerá por parte do Concello de Camariñas con fondos do Plan Único da Deputación da Coruña.