- O uso desta tarxeta no transporte escolar deixa «sen dereito de reserva de praza e gratuidade aos escolares con menos de 2 quilómetros de traxecto ao centro», sinalan desde o Concello
O Concello de Camariñas trasladará á Dirección Xeral de Mobilidade da Xunta de Galicia as inquedanzas das ANPA do IES Pedra da Aguia e do CEIP Ponte do Porto.
A implantación da tarxeta “Xente Nova” para o uso do transporte escolar afecta á comunidade educativa de ambos centros camariñáns e de especial xeito ao alumnado de Ponte do Porto ao deixar «sen dereito de reserva de praza e gratuidade aos escolares con menos de 2 quilómetros de traxecto ao centro», sinalan desde o consistorio, afirmando que tampouco se están tendo en conta as «circunstancias económicas, sociais e familiares de cada un dos alumnos que viven nunha contorna rural».
Outro dos problemas que detectan desde as asociacións de pais e nais é que a tarxeta presenta unha recarga de 20 euros e necesita uns prazos e uns períodos para que se devolva o importe das viaxes usadas. Así, sería necesario «agregar un importe determinado para poder empregala durante un mes nas viaxes de ida e volta», ademais de que a xestión da mesma deberá realizarse en oficina afíns, sendo necesarios os desprazamentos a outros concellos que se atopan a «máis de 10 quilómetros».
A alcaldesa, Sandra Ínsua, lamenta que «en pleno século XXI teñamos que esixir que o alumnado do rural e da contorna urbana sexa tratado cos mesmos dereitos».