O BNG presentou este xoves a campaña con motivo do 8M, nesta ocasión centrada na denuncia da cousificación e na sexualización da muller, que persiste a día de hoxe e que mesmo é normalizada cando desde un ente público como TVE se elixe unha canción, -SloMo-, cuxa letra incide en dar unha imaxe estereotipada das mulleres, letra que é utilizado pola formación nacionalista precisamente para facer a súa campaña.
“A pretensión é denunciar que sigue existindo unha cousificación e sexualización dos corpos das mulleres”, sintetizou a portavoz nacional, Ana Pontón, a quen lle parece especialmente grave que un medio público se sume a normalizar esa concepción e esa imaxe a través dunha letra que a campaña do BNG convida a reescribir.
O 27 de febreiro, RTVE afirmou que está disposta a corrixir a letra do tema se así o suxire o Observatorio de Igualdade de RTVE, que se atopa analizando esta cuestión. Poucos días antes, o presidente da Corporación, José Manuel Pérez Tornero, defendera a candidatura de Chanel ante as críticas do PSOE, que considera que a canción «remite á prostitución».