- As bandeiras ondean a media hasta nos edificios oficiais en Galicia, onde o Goberno rexional decretou 3 días de loito polas vítimas do naufraxio do Villa de Pitanxo.
A Garda Costeira do Canadá deu orde de retirarse e de suspender a busca. As ondas chegan aos 10 metros de altura, algunhas aínda máis. Hai moito vento e mar de fondo, unha combinación fatal para a navegación. A decisión das autoridades canadenses prodúcese cando as posibilidades de atopar con vida algún dos doce desaparecidos son nulas. De feito, prolongaron os labores de busca e rescate máis do tempo sinalado polas táboas de supervivencias nas condicións que se dan nas augas do Gran Banco de Terra Nova e que indican que tras 24 horas non existen opcións reais de atopar os pescadores con vida. Familiares dos tripulantes do rastreiro Villa de Pitanxo, afundido en augas canadenses o martes, pediron este mércores en Vigo continuar coa procura dos desaparecidos e que se diriman responsabilidades tras o naufraxio deste barco en pleno temporal. O barco galego Playa de Menduíña Dous está a 450 quilómetros de terra, nel van volver a porto os tres sobreviventes da traxedia. O naufraxio do Villa de Pitanxo produciuse o mesmo día que o 40 aniversario do desastre da plataforma petroleira Ocean Ranger, que se afundiu na zona do Gran Banco de Terranova o 15 de febreiro de 1982 como consecuencia dunha tormenta invernal.