- A rede de colectores tamén segue a estenderse, instalándose o último en Sofán
No mes de agosto recolléronse 1.395 quilos nos colectores de aceite de cociña usado distribuídos por todo o Concello de Carballo. A cifra correspóndese practicamente coa media mensual deste ano, que xa se sitúa nos 1.378,5 quilos.
Dos oito primeiros meses do 2020 destacan especialmente os incrementos de dous meses: marzo e xuño, con 2.003 e 2.060 quilos recollidos, respectivamente. Estas cifras supoñen máis do dobre dos meses de xaneiro e febreiro (935 e 980 quilos), case o dobre de abril (1.070 quilos) e están moi por riba do resto dos meses (1.220 en maio e 1.365 en xullo).
Nestes momentos hai 29 puntos de recollida, xa que se acaba de instalar un novo en Sofán, que se suma aos distribuídos por todos os barrios da zona urbana e tamén por distintos puntos da rural: Razo, Pedra do Sal (Lema), Berdillo, Ardaña, Sísamo, Feira de Berdillo (Artes) e Imende (Noicela).
Os aceites de cociña son altamente contaminantes. Por cada litro recollido evítase a contaminación de 1.000 litros de auga, ademais de solventar algún dos problemas de drenaxe nas tubaxes, desaugadoiros e avarías nas depuradoras.