O grupo temático de política de innovación social do Eixo Atlántico reuniuse este xoves en Carballo para discutir as estratexias e o plan de acción conxunto no ámbito social, tendo en conta que a organización integra espazos de dous países, pero tamén a necesidade de avanzar no proceso de innovación transformadora dos servizos e das políticas sociais deste amplo territorio ante os novos retos que van xurdindo.
O alcalde de Carballo, Evencio Ferrero, exerceu como anfitrión do encontro xunto co secretario xeral do Eixo Atlántico, Xoán Vázquez Mao, e o alcalde de Ferrol, José Manuel Rey, presidente do grupo temático de política social do Eixo.
A xornada de traballo reuniu no salón de plenos carballés a representantes dos concellos de Braga, Guimaraes, Ourense, Santiago, Ferrol e Carballo, así coma da Deputación Provincial de Ourense, que integran a comisión xunto con Culleredo e que, por segundo ano consecutivo, elixiron a capital de Bergantiños coma sede do encontro.