A Xunta de Goberno Local aprobou a concesión de axudas para o pagamento do subministro enerxético a 118 familias do concello. Outras 8 foron rexeitadas por non cumprir cos requisitos establecidos.
As subvencións van destinadas ás persoas maiores de 18 anos ou menores emancipadas que estean empadroadas no termo municipal cunha antigüidade mínima de seis meses, e que cumpran, ademais, algún dos seguintes requisitos:
- Ser beneficiarias do bono social das diferentes comercializadoras de electricidade, como mínimo durante os tres meses anteriores á convocatoria das axudas.
- Recibir osixenoterapia domiciliaria polo menos durante seis meses antes da convocatoria das axudas.
- Recibir tratamento de diálise peritoneal domiciliaria polo menos durante seis meses antes da convocatoria das axudas.
Con esta medida, impulsada dende a Concellaría de Igualdade e Benestar, dende o Concello de Carballo pretenden axudar ás veciñas e veciños con máis dificultades para facer fronte ás facturas da luz. Cada unha das 118 familias beneficiarias recibirá nas vindeiras semanas unha axuda de 200 euros nun pago único, correspondente á anualidade de 2022. Na primeira convocatoria, realizada o ano pasado, concedéranse 93 axudas.
Estas subvencións son compatibles coas liñas de axuda que poidan convocar outras administracións.