- A área de Deporte está a traballar cos clubs na procura de opcións que permitan manter a actividade deportiva
O Concello de Carballo iniciou esta semana unha rolda de contactos coas entidades deportivas para analizar os efectos das limitacións derivadas do estado de alarma polo COVID-19 e, na medida do posible, intentar minimizalos. Para o goberno municipal, o deporte é un elemento fundamental na mellora da calidade de vida da cidadanía, e por iso pretende realizar unha posta en común que permita promover actuacións encamiñadas a manter a actividade deportiva e garantir o acceso dos deportistas de base á práctica deportiva.
Na primeira xuntanza, celebrada o xoves 23, participaron entidades que utilizan os pavillóns de deportes para as súas actividades, e que transmitiron ao alcalde, Evencio Ferrero, e o concelleiro de Deporte, Marcos Trigo, unha valoración moi positiva da sensibilidade amosada polo Concello. Este venres houbo un novo encontro, nesa ocasión cos colectivos que utilizan as piscinas municipais, e nos vindeiros días continuará a rolda de contactos, sempre de maneira telemática, co resto das entidades.
O goberno municipal quere coñecer os problemas que está provocando a nova situación ás distintas entidades, ademais de analizar e prever o impacto que a crise sanitaria poida ter sobre a actividade deportiva para a próxima tempada.