- O programa de reciclaxe conta nestes momentos con máis de 1.500 colaboradores
Os participantes do programa de reciclaxe ‘Ti tes a chave’ de Carballo depositaron o ano pasado 346.400 quilos de residuos orgánicos nos colectores de cor marrón de Sogama que hai espallados pola zona urbana.
Dende o Concello sinalan que nesta iniciativa colaboran máis de 1.400 familias e 125 empresas que xa están comprometidas coa xestión sostible dos residuos orgánicos, e que nas últimas semanas puideron comprobar, a través das 480 bolsas de compost repartidas, cal é o aproveitamento dos biorresiduos.
As persoas interesadas en sumarse a esta campaña e vivan na zona urbana tan só teñen que solicitar a chave para abrir os colectores marróns. Para iso será necesario achegarse ata o local de Carballo Limpo, nas galerías da rúa Desiderio Varela, en horario de 10:00 a 14:00 horas e de luns a venres. Entregaráselles un caldeiro de dez litros de capacidade, tres atados de bolsas compostables e un tríptico informativo. Todo de balde.
No caso de que os participantes vivan no rural e dispoñan dun terreo de como mínimo 50 metros cadrados, estes deberán presentar unha solicitude no rexistro municipal e despois recibirán, de xeito gratuíto, un composteiro individual de 390 litros de capacidade e un aireador.