O Concello de Carballo, en cumprimento da normativa vixente pola declaración do estado de alarma, compensará a suspensión do servizo de comedor escolar durante o tempo que se manteña a situación actual mediante a entrega de tarxetas para a compra de alimentos por valor de 60 euros por cada neno ou nena que desfrutase do servizo de maneira gratuíta.
As familias que, polo tanto, tivesen o comedor subvencionado ao 100% deberán cubrir o documento que se está enviando dende os colexios públicos a través da APP Abalar Móbil e envialo por correo electrónico ao centro correspondente antes das 14.00 horas deste luns 30 de marzo. Se algunha persoa ten dificultades para enviar o formulario pode mandar o nome do/a alumno/a, xunto co da nai ou o pai e o DNI correspondente. Dende os centros enviaranse os datos ao departamento de Servizos Sociais, e posteriormente comunicaranse polo mesmo sistema o día e hora da entrega das tarxetas.