Tras a mala experiencia vivida este xoves en diferentes puntos da rede viaria así como no centro urbano carballés debido á formación de placas de xeo que provocaron varios desgustos e numerosos danos, na madrugada deste venres un tractor encargouse de distribuír varias capas de sal coa finalidade de minorar ou suprimir os efectos doutra noite de temperaturas baixo cero. De todos os xeitos as autoridades recomendan á poboación máxima prudencia a primeiras horas da mañá, sobre todo en zonas sombrías e non coller o coche se non é obrigatoriamente necesario. Aínda que non hai ningunha alerta meteorolóxica para Carballo, tras a experiencia vivida este xoves, todas as precaucións poden ser poucas.