A presenza do novo Parque Comercial A Revolta, que abrirá ao público o luns 8 de maio, con firmas de importante relevo nacional e internacional, puxo en valor e por tanto no mapa de futuros investidores, os terreos e naves desa zona de Carballo.
A antiga nave de Sánchez Viqueira, que na actualidade alberga un comercio chinés, polo menos ata 2027, está no mercado valorada en 1,5 millóns de euros. A antiga sala de festas A Revolta, practicamente despezada, fora comprada no ano 2003, por aquel entón intacta, por pouco máis de 350.000 euros. Novamente vendida por partes no 2006, agora non paran de choverlle ofertas, pero o prezo variou.
Con algún que outro proceso xudicial polo medio e nun estado ruinoso, a propiedade maioritaria sitúa o seu valor en polo menos 700.000 euros. A multinacional de alimentación Burger King interesouse estas últimas semanas polo inmoble, pero o prezo pasou a ser algo privativo e con algún que outro inconveniente.
A antiga discoteca, por si soa, carece de aparcamento, a parte frontal expropiada por Obras Públicas, a falta de coincidencia en metros catastrais (4.827 catastrais, 3.918 reais, 1.071 construídos) e a carencia dun aparcamento subterráneo fan pouco viable o aproveitamento do inmoble tal e como o coñecemos. Vista de fronte, pola súa dereita linda cun solar propiedade da conserveira Calvo e pola súa esquerda tres leiras máis, todas de diferentes propietarios.
