Trátase dunha campaña aprol do 25N (Día Internacional da Eliminación da Violencia contra as Mulleres) na que dende o concello convidan ao comercio a que se sume decorando de negro os seus escaparates. Os/as empresarios/as interesados/as non teñen máis que enviar un correo electrónico cos seus datos ao enderezo carballoennegro@gmail.com ou chamar ao número de teléfono 981 700 688.
Arredor deste día a Concellaría de Igualdade e Benestar e o Centro de Información á Muller (CIM) levarán a cabo, como todos os anos, un programa de actividades orientadas á sensibilización da poboación en xeral.
Nesa dirección vai o obradoiro “Camiñando pola igualdade”, que retomou a súa actividade esta semana e que se celebra os mércores alternos, de 19.00 a 20.30 horas, na Biblioteca Rego da Balsa.
Ademais das actividades, este ano tamén está previsto un curso de autodefensa para mulleres, que se celebrará os días 6 e 8 de novembro, de 10.00 a 14.00 horas, no Pazo da Cultura. O curso, organizado en colaboración coa Secretaría Xeral de Igualdade, será impartido por un monitor da Academia Galega de Seguridade.
O prazo de inscrición segue aberto. Así mesmo, a Concellaría de Igualdade recollerá as solicitudes de mulleres interesadas en participar noutra iniciativa deste tipo en horario de tarde. O curso celebraríase de cara ao vindeiro ano sempre que exista un grupo de 15 participantes.