Membros da directiva da asociación antidroga Vieiro reuníronse cos orientadores dos centros educativos de Carballo co fin de sumar na prevención das condutas adictivas no ámbito escolar. A entidade aproveitou as xuntanzas para lembrar as iniciativas que ten en marcha nos colexios a través da colaboración das administracións públicas, ademais de facer balance dos resultados de pasadas edicións.
As reunións tiveron lugar o 21 e 26 de setembro. No primeiro encontro a directiva de Vieiro tivo contacto con responsables do departamento de Orientación dos colexios CEIP Fogar, Nétoma-Razo e CRA Ponta da Pedra, o CEIP San Luís Romero e o CPR Artai; mentres que no segundo participaron os orientadores dos institutos Alfredo Brañas, Isidro Parga Pondal e Monte Neme.
Desde Vieiro agradecen a implicación do sector educativo na formación máis emocional dos seus alumnos grazas a iniciativas como ‘Na horta cos meus amigos’, ‘Creando saúde’ ou ‘Escola de familias’.