Carme da Silva reivindica a transferencia a Galicia da AP-9

• A cabeza de lista do BNG para o 10N asegura que é “intolerábel” que se manteña “secuestrada a vía de comunicación máis importante de Galiza”.

Ao pé da autoestrada do Atlántico (AP-9), un eixo de comunicación fundamental para o país, a cabeza de lista do BNG pola provincia de Pontevedra Carme da Silva reivindicou este sábado a súa transferencia a Galiza e a gratuidade para todos os galegos e galegas. A nacionalista asegurou que resulta intolerábel que a concesionaria manteña “secuestrada” a vía coa connivencia dos gobernos do PP e do PSOE que, ao seu entender, altérnanse “na tomadura de pelo aos galegos”. Subliñou, de feito, que “só se Galiza ten capacidade de decidir en Madrid cunha voz propia, da man do BNG, as galegas e galegos deixaremos de pagar a peaxe”.