- Os feridos resultaron ser catro mozos de 18, 19, 20 e 20 anos.
O sinistro produciuse arredor das 07:30 horas, no quilómetro 107 da AC-550. Diversos particulares contactaron co 112 Galicia para informar dunha colisión na que, nun primeiro momento, parecían implicados dous coches e na que podería haber persoas feridas. Ademais, advertían da presenza de restos na vía e de vehículos obstaculizando a circulación.
Acto seguido, desde o 112 Galicia informouse ao Servizo de Urxencias Sanitarias de Galicia-061, aos Bombeiros de Ribeira, ao Grupo de Apoio e Emerxencias Municipal (GAEM) de Ribeira, e aos axentes da Garda Civil e da Policía Local.
Unha vez no punto, os equipos de emerxencia confirmaron que finalmente se trataba dun accidente con tres vehículos implicados e que catro persoas foran trasladadas ao centro hospitalario do Barbanza para recibir atención médica.