O Concello de Cerceda abre o prazo para solicitar o servizo ‘Bos días cole’ para o curso 2023/2024. A prestación do servizo estará supeditada a un mínimo de 13 persoas menores usuarios/as, así como a situacións sobrevidas que poidan darse e que afecten ó seu funcionamento ou posta en marcha. Será ata o 7 de xullo para todo o alumnado matriculado no centro correspondente.
Ofrécese, con este programa, un servizo de monitores e outro de almorzo, e tres tipos de matrícula: menores usuarios/as fixos/as, que poderán facer uso do mesmo de luns a venres; menores usuarios/as fixos/a, por días soltos e que poderán facer uso do mesmo ata un máximo de 12 días ó mes; menores usuarios/as ocasionais, no caso de que queden prazas vacantes.
Tódalas persoas que soliciten o servizo aboarán 10 euros en concepto de matrícula. As persoas usuarias fixas, con matrícula todos os días de semana, poden escoller entre estas dúas opcións: sen almorzo, 30 euros cada mes ou con almorzo, 55 euros cada mes. As persoas usuarias fixas mensuais matriculadas por días soltos, ata un máximo de 12 días, a partir do día 13 aboarase o mes completo. Pódese escoller entre: sen almorzo, por 2,50 euros ó día; e con almorzo, 3,50 euros ó día. As persoas usuarias ocasionais poderán escoller entre dúas opcións: sen almorzo, por 3,50 euros cada día; e con almorzo, por 4,50 euros cada día. Para máis información, as persoas interesadas poden contactar cos Servizos Sociais do Concello de Cerceda, no 981 686 068.