O Concello de Cerceda, a través da área de Servizos Sociais, completou unha nova edición do programa ‘O Carriño Solidario de Nadal’ co que achegou produtos de alimentación, aseo e hixiene ás familias do municipio.
Trátase dunha iniciativa en colaboración cos establecementos alimentarios de Cerceda coa que se busca recoller alimentos non perecedoiros e outros artigos de primeira necesidade cos que contribuír ao benestar da veciñanza. A día de hoxe considérase unha campaña básica de apoio ante a situación actual de dificultades que están a pasar algunhas unidades familiares por mor da covid-19.
Este ano realizouse a entrega de produtos específicos de Nadal, xunto con lotes de agasallos para as máis pequenas e pequenos da casa.
A concelleira de Servizos Sociais, Catrina Queijo, transmitiu o seu “máis profundo agradecemento a todas as persoas que colaboraron coa iniciativa e que seguen a mostrar a súa solidariedade co resto de veciñas e veciños nunha etapa especialmente complicada no eido económico e sanitario”.