A Axencia de Doazón de Órganos e Sangue (ADOS), fai un chamamento á cidadanía a doar sangue e, moi especialmente, aos doantes dos grupos sanguíneos 0 positivo, A positivo e B positivo. As reservas destes grupos presentan niveis baixos, polo que resulta preciso reforzar o permanente chamamento á participación nas campañas de doazón de sangue.
Desde ADOS convídase a todas as galegas e galegos a continuar amosando o seu carácter solidario para incrementar o numero de doazóns de sangue. Cómpre remarcar que os hospitais galegos precisan mensualmente ao redor de 10.000 doazóns.
Pode doar sangue calquera persoa con máis de 18 anos, que pese máis de 50 quilos e que non padeza nin teña padecido enfermidades transmisibles polo sangue (VIH, hepatite B ou C…). A doazón de sangue é un acto sinxelo que permite a moitas persoas solucionar o seu problema de saúde e mesmo salvar a vida.