- Tras a solicitude do Goberno chileno, España envía a 50 efectivos da Unidade Militar de Emerxencias para colaborar na loita contra o lume.
Xa son 24 as persoas falecidas nos virulentos incendios que arrasan o centro e o sur de Chile. Un milleiro resultaron feridas, 16 atópanse en estado grave. Hai, ademais, dez persoas desaparecidas. Dezaseis das mortes ocorreron na rexión de Biobío, cinco na Araucanía e dúas en Ñuble. Case 200 familias quedáronse sen fogar nos peores incendios forestais en décadas.
As autoridades declararon o estado de catástrofe na rexión da Araucanía, que está ao sur de Ñuble e Biobío, rexións onde xa fora emitida esta declaración de emerxencia. Queimáronse xa máis de 45.000 hectáreas nestas tres rexións e na dos Lagos.
Hai máis de 250 incendios forestais en todo Chile, 151 dos cales estaban baixo control, segundo a axencia de desastres Senapred de Chile. Senapred informou de que, nestes momentos, 2.368 brigadistas loitan contra o lume, axudados por 66 aeronaves e 3.000 voluntarios dos bombeiros.