China concluíu as súas manobras militares ao redor de Taiwan cunha simulación do bloqueo da illa e coa anticipada participación do Shandong, o segundo portaavións do país asiático. O Ministerio de Defensa chinés anunciou o «completo éxito» das manobras, que comezaron o venres en represalia pola reunión do pasado mércores en California entre a presidenta taiwanesa, Tsai Ing-wen, e o presidente da Cámara de Representantes dos Estados Unidos, Kevin McCarthy. «As tropas están listas para loitar en calquera momento», indicou a voceira Shi Yi, quen agregou que as forzas están «listas para esmagar de forma decidida calquera forma de separatismo e intentos de interferencia estranxeira». As manobras do luns centráronse na simulación dun «bloqueo marítimo» da illa: numerosos destrutores e fragatas levaron a cabo misións de patrulla e simulacros de combate e ensaiaron o asalto a buques hostís á fuga. Pola súa banda Taiwan volveu expresar a súa «enérxica condena» contra as manobras militares e o seu ministerio de Defensa indicou en Twitter que as forzas armadas da illa permanecen en «alta alerta» por «continxencias», «mantendo firmemente os seus postos as 24 horas do día».