- As sesións impartíronse tanto nas instalacións do Centro Cívico como nas da Casa do Oleiro de Buño
O Concello de Malpica clausurou este luns os obradoiros de memoria e arranxos florais destinados a persoas maiores e con diversidade funcional. Ao acto acudiu o concelleiro de Benestar, Sergio García.
Os talleres realizáronse tanto nas instalacións do Centro Cívico municipal como nas da Casa do Oleiro de Buño.
Segundo informaron fontes do Goberno local, os participantes quedaron moi satisfeitos coa experiencia, cuxo obxectivo prioritario foi «promover a saúde mental e física destes colectivos logo dun período marcado pola ausencia de contacto social e as consecuencias da covid-19».
O concelleiro de Benestar, Sergio García, manifestou a súa satisfacción «co éxito da iniciativa, que completou todas as prazas dispoñibles ás poucas horas de abrirse a convocatoria», dando pé a futuras actividades desta índole.