Comezan a substituír os aeroxeradores do parque eólico Monte Redondo, en Vimianzo

Os 66 aeroxeradores actuais vanse substituír por 11 máis modernos, con máis potencia e menor impacto visual. A conselleira de Medio Ambiente, Ánxeles Vázquez, visitou Monte Redondo e subliñou que con este tipo de parques se reducen as emisións de CO2. Está previsto que as obras neste parque eólico de Vimianzo estean rematadas en xuño de 2026. Amais de Monte Redondo, Naturgy desenvolve en Galicia outros dous proxectos de repotenciación. Nas Somozas, onde substituirá 81 aeroxeradores por 9, e no parque eólico Novo, nos concellos de Valdoviño, San Sadurniño e Narón, que pasará de 25 a 5 aeroxeradores.