- O plan de reparación de lousas, que conta cun orzamento de preto de 40.000 euros, céntrase en rúas peonís do centro da cidade
O Concello de Ferrol, a través da concellería de Obras e Servizos, que dirixe Ana Lamas, puxo en marcha esta mesma semana o plan de reparación de lousas no barrio da Magdalena, un proxecto que contempla ao redor de 300 intervencións e cuxo prazo de execución é de dous meses. A edil visitou este martes os traballos, que se centraron na Praza de España e na rúa Real.
O plan de reparación de lousas, que conta cun orzamento de preto de 40.000 euros, céntrase en rúas peonís do centro da cidade nas que se detectaron perigos para o tránsito dos viandantes. Consiste na recolocación de pedras que están soltas ou desniveladas, aínda que tamén se están a realizar traballos complementarios en arquetas, bolardos, bordos ou adoquíns. As principais rúas nas que se está a actuar son Magdalena, Real, Dolores, María, Sol, Sánchez Barcáiztegui, Coruña, Igrexa, praza de España e Amboage, entre outras.