- A Xunta decretou tres días de loito polas vítimas do pesqueiro afundido nas augas de Terranova, no Canadá
Foron varios os concellos da Costa da Morte que este mércores decidiron gardar un minuto de silencio polo pasamento dos mariñeiros do Villa de Pitanxo, o pesqueiro galego que naufragou na madrugada deste martes en augas de Terranova, no Canadá.
Membros das corporacións municipais de Muxía, Malpica ou Ponteceso, así como funcionarios e distintas asociacións, mostraron o seu pésame por unha nova traxedia no mar onde dun total de 24 tripulantes só sobreviviron tres. Ata o de agora recuperáronse dez corpos e once mariñeiros seguen desaparecidos.
A Xunta de Galicia decretou tres días de loito en homenaxe ás vítimas e o seu presidente, Alberto Núñez Feijóo, destacou que o goberno galego prestará «todo tipo de axuda, especialmente psicolóxica, asistencial e sanitaria, ademais de toda a información da que dispoñamos ás familias afectadas».
