Continúan avanzando as obras de mellora de infraestruturas públicas que están en marcha no Concello da Laracha.
O proxecto en execución na zona de produtos do campo do recinto feiral de Paiosaco está prácticamente rematado. Despois de realizarse a pavimentación con aglomerado asfáltico en quente dunha superficie de seis mil metros cadrados, nos últimos días realizouse o pintado tanto dos pasillos como dos postos de venda e soamente resta por marcar a numeración de ditos postos para dar por rematadas as actuacións previstas.
A actuación ten por obxectivo potenciar a feira de Paiosaco ao facilitar a actividade tanto dos vendedores como dos compradores e visitantes ao mellorarse as condicións do firme e favorecer a circulación das persoas polas zonas marcadas.
O Concello, que promove e financia integramente a actuación, inviste 50.000 euros na execución deste proxecto.