O vicepresidente da Deputación da Coruña e deputado de Turismo, Xosé Regueira, foi o encargado de abrir este martes a quenda de intervencións no acto oficial de inauguración do Congreso Nacional de Ecoturismo que reune no Pazo de Mariñán a relatores e axentes relacionados co sector empresarial vinculado ao ecoturismo, representantes de grupos de desenvolvemento local, de asociacións de turismo rural, persoal técnico de espazos naturais e de espazos protexidos, centros de investigación relacionados co sector e axencias e operadores turísticos estatais e internacionais especializados en ecoturismo.
No acto oficial de apertura tamén participaron a alcaldesa de Bergondo, Alejandra Pérez, o presidente da Reserva ae Biosfera Mariñas Coruñesas, José Antonio Santiso, a subdirectora adxunta de Desarrollo y Sostenibilidad Turística de la Secretaría de Estado de Turismo, Ana Jar, o presidente da Asociación de Ecoturismo en España, Jesús M. Pozuelo, e o delegado territorial da Xunta, Gonzalo Trenor.
Regueira, defendeu “o compromiso co territorio” de iniciativas como as que se amparan baixo o paraugas da Reserva da Biosfera Mariñas Coruñesas e Terras do Mandeo “á hora de afrontar grandes retos globais e que afectan á saúde do planeta”. O vicepresidente lembrou que o propio lugar no que se está a desenvolver o Congreso estatal, tanto o Pazo como os xardíns, son espazo protexido e que contan coa certificación Observer® de Turismo Científico. Convidou a todas as persoas asistentes a coñecer durante os tres días do congreso o propio territorio da Reserva, así como a cultura, a lingua e a gastronomía.