A Subdirección Xeral de Inspección e Procedemento Sancionador do Ministerio de Consumo está a investigar a sete aerolíneas de baixo custo que operan en territorio nacional por supostas irregularidades na súa política de equipaxes de man e asignación de asentos.
As prácticas sobre as que o ministerio liderado por Alberto Garzón abriu unha investigación están relacionadas coa cobranza como “extras” de servizos que, xeralmente, son necesarios e imprescindibles para os pasaxeiros á hora de viaxar.
É o caso, por exemplo, da cobranza dun importe adicional ou suplemento por levar unha maleta en cabina sen facturar ou por seleccionar un asento, mesmo no caso de menores de idade ou persoas dependentes.
O Ministerio de Consumo, ao amparo das súas novas competencias sancionadoras ante fraudes masivas, estuda se este tipo de prácticas comerciais por parte de compañías baixo custo son abusivas ou desleais e se contraveñen, de forma xeneralizada, a normativa de consumo.
A Subdirección Xeral de Inspección e Procedemento Sancionador tamén investiga se, mediante prácticas como a segmentación de prezos, os operadores poderían estar a obter posicións privilexiadas nos motores de procura e comparadores de voos online con prezos moi inferiores aos que realmente termina pagando o consumidor na transacción final.
As compañías investigadas ostentan, no seu conxunto, unha cota de mercado por encima do 30% tanto dentro como fóra de Europa, polo que teñen incidencia na contratación de millóns de pasaxeiros.
As condutas investigadas constituirían presuntas infraccións graves que poden sancionarse con multas de entre 10.000 e 100.000 euros, podendo sobrepasar estas cantidades ata alcanzar entre catro e seis veces o beneficio ilícito obtido ou ata o 4% da facturación se se confirmasen como prácticas xeneralizadas no seo da Unión Europea.