O goberno local de Betanzos continúa co plan de mellora de viarios no centro histórico cunha actuación na rúa Nova e na rúa do Hórreo. Con elas, dáse continuidade a actuacións similares realizadas nesta mesma zona, segundo explicou a alcaldesa, María Barral, que visitou os traballos xunto ao concelleiro de Obras, Diego Fernández e o persoal técnico municipal. A adxudicación está incluída no Plan Único 2019 que se financia conxuntamente coa Deputación Provincial.
Os traballos prevén o derrubamento do pavimento actual, así como a escavación de gabias para a colocación dos novos servizos de saneamento, pluviais e abastecemento, dentro dun proxecto que pretende contribuír a reforzar os valores arquitectónicos e espaciais contribuíndo así á súa revalorización patrimonial, social e turística, ademais por suposto de optimizar o funcionamento das instalacións urbanas.