A Xunta abriu o prazo de presentación de solicitudes á terceira edición dos premios Talento Mozo Galicia, cos que recoñece e dá visibilidade ao enxeño e capacidades das mozas e mozos da xuventude da Comunidade. O Diario Oficial de Galicia (DOG) publicou o pasado martes, día 14 de febreiro, as bases e a convocatoria deste certame, no que se distinguen cinco modalidades: Ciencia, Rural, Deporte, Empresa e Cultura e creación.
As persoas interesadas en concorrer a estes galardóns teñen un mes de prazo —contado a partir do día seguinte da publicación da convocatoria no DOG— para presentar as súas solicitudes por medios electrónicos, a través do formulario que teñen dispoñible na sede electrónica da Administración autonómica. Os requisitos son ter entre 18 e 35 anos, estar domiciliado en Galicia e contar cunha traxectoria relevante na modalidade do premio polo que compita. Ademais, unha mesma persoa non poderá presentarse como candidata a máis dunha modalidade do premio e os gañadores en edicións anteriores non poderán volver presentarse nin na categoría na que resultasen galardoadas nin nas demais.
Así mesmo, as mozas e mozos que se presenten a Talento Mozo Galicia deberán achegar coa solicitude unha memoria descritiva do proxecto ou traxectoria que opta ao premio; o seu currículo e documentación oficial acreditativa dos méritos alegados. Tamén poderá achegar outra documentación que considere relevante, como apoios á candidatura, publicacións ou fotografías.
A persoa gañadora en cada unha das modalidades recibirá unha gratificación económica de 5000 euros, ademais dunha distinción honorífica e un diploma acreditativo. A entrega de premios Talento Mozo Galicia farase nun acto público de carácter institucional co fin de poñer en valor ás persoas gañadoras en cada unha das categorías.