O Concello de Malpica de Bergantiños pon en marcha o II Concurso Fotográfico “Malpica, natureza en olladas”, unha iniciativa coa que busca descubrir diferentes formas de mirar e interpretar o territorio a través da fotografía.
O concurso ten como obxectivo seleccionar as imaxes que formarán parte do Calendario 2027 do Concello de Malpica de Bergantiños, buscando fotografías orixinais e artísticas que poñan en valor os espazos e recunchos máis característicos do municipio.
A temática abrangue paisaxes, monumentos naturais, arquitectura, obxectos e recunchos emblemáticos de Malpica, sempre que se trate de lugares recoñecibles do municipio. As fotografías deberán realizarse dentro do termo municipal e recoméndase o formato horizontal para facilitar a súa adaptación ao calendario.
As persoas interesadas poderán participar desde o 11 de setembro ata o 30 de outubro de 2026, ás 23:59 horas. Cada participante poderá presentar tantas fotografías como desexe, aínda que, no caso de presentar varias, só poderá optar a un dos premios.
As fotografías deberán enviarse en formato JPG ao enderezo turismo@malpicadebergantinos.es, acompañadas dos datos da persoa autora e dun pequeno texto explicativo sobre o motivo da elección da imaxe.
O concurso contará cun total de 13 premios:
1º premio de 200 euros, para a fotografía que sexa seleccionada como portada do calendario.
12 premios de 60 euros, correspondentes ás fotografías que ilustrarán cada un dos meses do Calendario 2027.
En total, repartiranse 920 euros en premios.
O xurado valorará especialmente a orixinalidade, a calidade técnica —composición, encadre, iluminación e resolución— e a capacidade da fotografía para poñer en valor o Concello de Malpica, mostrando paisaxes, monumentos naturais e recunchos
emblemáticos identificables.
A concelleira de Turismo, Noelia Freijeiro, anima á veciñanza e ás persoas afeccionadas á fotografía a participar nesta segunda edición e destaca a oportunidade de descubrir Malpica desde perspectivas diferentes.
“Este concurso pretende poñer en valor a riqueza paisaxística e patrimonial de Malpica a través da creatividade e da mirada de quen a fotografía. Cada persoa pode descubrir e interpretar o noso concello dunha maneira diferente, e iso é precisamente o que queremos poñer en común.”
Freijeiro subliña tamén o carácter persoal e creativo da iniciativa:
“O máis bonito desta iniciativa é que non buscamos simplemente unha fotografía bonita, senón unha ollada diferente, unha perspectiva persoal de Malpica. Queremos que cada imaxe conte algo, que transmita unha emoción ou nos permita descubrir un lugar coñecido doutra maneira. E, entre todas esas olladas, queremos construír un calendario que represente a diversidade, a identidade e a beleza do noso municipio.”
A concelleira anima a participar tanto a persoas afeccionadas como profesionais e lembra que non é necesario ser fotógrafo profesional para ter unha mirada capaz de captar unha imaxe especial de Malpica.
“Animamos a todo o mundo a coller a cámara ou o móbil, percorrer Malpica e buscar ese recuncho, esa luz ou ese instante que merece ser gardado. Quizais esa fotografía que hoxe temos no teléfono sexa mañá unha das páxinas do Calendario 2027 de Malpica.”
O fallo do xurado producirase antes do 9 de novembro de 2026 e será comunicado ás persoas premiadas, ademais de difundirse a través dos medios de comunicación, da páxina web e das redes sociais municipais.
Desde o Concello animan á participación nesta segunda edición e convidan a mirar Malpica con outros ollos, descubrir novas perspectivas e compartir a propia visión do municipio a través da fotografía.