- A subida do 0,9% das pensións aprobarase cando haxa Goberno e aplicarase con carácter retroactivo
Este venres celebrouse o último Consello de Ministros deste 2019, e non finalizou ben. A revalorización das pensións e a subida do salario mínimo interprofesional (SMI) -que aínda non está determinada- non se farán efectivas ata que haxa Goberno.
A ministra portavoz en funcións, Isabel Celaá, descartou que o Goberno vaia adoptar ningunha desas dúas medidas estando en funcións, polo que haberá que esperar.
A revaloración das pensións do 0,9% farase efectiva dunha vez, e “cando sexa posible”, xa que para o Executivo, subir agora un 0,25% e posteriormente un 0,65% duplicaría o custo na comunicación aos pensionistas e malgastaría recursos na loxística para liquidar as dúas subidas, explicou Celaá. A ministra tamén expuso que a subida das pensións aplicarase con carácter retroactivo desde o 1 de xaneiro de 2020.
En canto á subida do SMI, Celaá declarou que a contía da subida aínda está pendente de negociación e que, entre tanto, aprobouse a prórroga do real decreto polo que se fixou en 900 euros brutos mensuais para 2019. Tamén reiterou o compromiso socialista de que chegue ao 60% do salario medio ao final da Lexislatura, ao redor de 1.200 euros.