Corea do Norte lanzou este sábado un mísil balístico intercontinental (ICBM) que caeu augas da zona económica exclusiva (ZEE) xaponesa, o que envía unha contundente mensaxe en vésperas de que Seúl e Washington inicien manobras militares conxuntas. O lanzamento chega despois de que Pionyang, que en 2022 realizou un número récord de lanzamentos de mísiles, estivese máis de mes e medio sen realizar un só test de armas, un lapso sen actividade norcoreana neste terreo que facía tempo que non se vía na península. Á espera de coñecerse máis datos sobre o proxectil, cuxa tipoloxía exacta posiblemente revele Pionyang, analistas e Gobernos tratan de establecer se o disparado é un novo tipo de ICBM como o que o réxime fixo desfilar por primeira vez hai dez días durante os fastos do 75 aniversario do seu exército. Unha cámara da radiotelevisión pública nipoa NHK situada na próxima localidade de Hakodate aparentemente captou fragmentos do proxectil en chamas iluminando o ceo nocturno na súa fase de reentrada.