A estrada da parroquia de Caión que comunica o núcleo do Outeiro co cruce da DP-1503 á altura de Corteo permanece pechada temporalmente ao tráfico desde este xoves e así está sinalizado para advertir da circunstancia e evitar o acceso dos vehículos.
O motivo do corte da circulación é o importante dano que sufriu a superficie de rodadura provocado polo xurdimento dunha balsa de auga subterránea tralas intensas choivas rexistradas nas últimas semanas. O alcalde, José Manuel López Varela, e o concelleiro de Obras, Pablo Cambón, desprazáronse ata esa zona para coñecer de primeira man o estado da calzada.
As obras de reparación xa comezaron a executarse e a estrada abrirase á circulación á maior brevidade e tan pronto sexa posible con garantía de seguridade para os usuarios.
As vías alternativas de acceso son por Xermaña (DP-1503) e polo Campo da Costa (DP-1909).