Unha de cal e outra de area en España, que este domingo volveu franquear a barreira dos 300 mortos por coronavirus. Rexistrou 331 falecidos, 43 vítimas mortais máis que o día anterior, tendo en conta que a cifra do sábado foi a máis baixa rexistrada no país desde o pasado 20 de marzo. A noticia positiva é que o número de persoas curadas supera as 100.000 desde o comezo do brote, das cales 2.144 foron dadas de alta nas últimas 24 horas. Por cuarta xornada consecutiva o número diario de curados volveu ser superior ao de novos casos, 1.831 este luns. Con todo, por primeira vez desde o pasado 18 de abril o número de persoas hospitalizadas superou ao de dadas de alta.
A alegría mostrada pola vicepresidenta da Transición Ecolóxica, Teresa Ribera, ao comezar a súa quenda na rolda de prensa do Executivo para dar as últimas novidades sobre a pandemia do COVID-19 é compartida por millóns de pais en toda España. Ribera, que ademais é a encargada de coordinar a desescalada da pandemia, era máis que consciente do difícil que foi para todos estar seis semanas sen que os menores de 14 anos puidesen poñer un pé na rúa. Agora xa poden saír: unha hora ao día, acompañados dun adulto, e sen afastarse máis dun quilómetro da súa vivenda.