As accións de Credit Suisse caeron un 24% na Bolsa de Zúric, un esborralle que arrastrou á baixa a outros valores da banca europea, despois de chegar a perder un 30%, nun aciago día para o segundo maior banco de Suíza, marcado pola negativa do Banco Nacional Saudita, o seu principal accionista, a darlle máis asistencia financeira.
Milán caeu o 4,61%, Madrid, o 4,37%; Londres, 3,83%; París, o 3,58%; Frankfurt, o 3,27%; e o índice Euro Stoxx 50, que agrupa ás maiores cotizadas, o 3,46%. Son os maiores descensos no que vai de ano en todos os casos.
As accións do banco de Zúric, un dos 20 maiores de Europa e un dos 50 principais do mundo, acabaron a xornada ao redor dos 1,7 francos suízos (1,74 euros), despois de situarse nun mínimo histórico de 1,5 francos durante a sesión (1,54 euros), cando xamais estiveran por baixo dos 2 francos por papeleta.