O futbolista Dani Alves alegou este mércores ante a xuíza que non está conforme co seu procesamento pola presunta violación dunha moza na discoteca Sutton de Barcelona, pero non o recorrerá porque quere «axilizar» o proceso e chegar cando antes a xuízo. Alves compareceu durante preto dun cuarto de hora ante a titular do Xulgado de Instrución número 15 de Barcelona, que lle comunicou o seu procesamento por un delito de agresión sexual con acceso carnal e deulle a oportunidade de declarar por última vez, antes de enviar o caso a xuízo.
Segundo fontes xurídicas, o internacional brasileiro, que foi trasladado aos xulgados desde o cárcere Brians 2, onde permanece desde o pasado mes de xaneiro, cinguiuse a unha breve manifestación para anunciar que non está «conforme» cos feitos que se lle atribúen no auto de procesamento, pero que non pensa recorrelo porque ten interese en chegar a xuízo canto antes. Deste xeito o auto de procesamento será declarado firme dentro duns días, posto que ningunha das partes ten a intención de recorrer.