De Galicia á Moncloa | Yolanda Díaz quere ‘ser a primeira presidenta de España’

0

Este é o camiño que quere emprender Yolanda Díaz (Fene, A Coruña), que este domingo anunciou en Madrid a súa intención de concorrer ás próximas eleccións xerais de decembro como candidata coa súa plataforma Sumar e fíxoo coa ausencia máis que significativa de Podemos. Na súa intervención, con múltiples referencias a Galicia, a líder de Sumar falou de feminismo, de diálogo, de política con maiúsculas, de saúde mental, de dependencia e de limitar o prezo de alugueiro da vivenda. Díaz estivo arroupada na súa posta de longo como presidenciable de todos os partidos e coalicións que se sitúan á esquerda do PSOE, menos o partido de Ione Belarra, que presionou ata este mesmo sábado coa firma dun acordo bilateral entre Podemos e Sumar para a celebración de primarias, ao que Díaz oponse. Tras percorrer 20 cidades co seu ‘proxecto de escoita’, Díaz colocouse este domingo na lista de presidenciables xunto aos principais líderes nacionais Pedro Sánchez (PSOE), Alberto Núñez Feijóo (PP) e Santiago Abascal (Vox), que a esperan xa na liña de saída. E fíxoo cun proxecto que foi fraguando durante meses e no que quere que prime por encima de todo a cordialidade de moitos partidos e moi pouco o protagonismo de ningunha formación concreta.