VOX interpuxo unha denuncia penal perante o xulgado de Instancia de Santiago de Compostela contra a alcaldesa do BNG, Goretti Sanmartín, e contra a subdelegada do Gobierno na Coruña, Obdulia Taboadela, polo que califica de “gravísimos feitos” ocorridos o 21 de setembro no Centro Sociocultural de Santa Marta, onde a esquerda radical e o separatismo galego, coa conivencia institucional, boicotearon violentamente un acto político legalmente autorizado da formación.
Segundo detalla a denuncia, VOX contaba con autorización para celebrar un acto de inicio de curso político coa intervención do eurodeputado Jorge Buxadé, a vicesecretaria nacional de Organización, María Ruiz, e os catro presidentes provinciais.
Con todo, un grupo de radicais da esquerda e do independentismo galego, convocados baixo o lema “Unidade popular fronte ao fascismo” por entidades como CNT Galiza, Galiza Nova, Erguer, Ceivar ou o Partido Comunista Revolucionario de Galiza, ocupou o centro municipal, despregou simboloxía ultraizquierdista e separatista e bloqueou os accesos.
Centos de persoas concentráronse nas inmediacións do recinto lanzando berros e intimidacións, nun ambiente de tensión que obrigou á Policía Nacional a intervir e cargar para protexer os cargos e simpatizantes de VOX, que finalmente non puideron acceder ao interior do centro sociocultural.
A denuncia subliña que tanto a alcaldesa Sanmartín, como titular do inmoble municipal cedido para o acto, como a subdelegada Taboadela, como autoridade gobernativa obrigada a garantir o dereito de reunión, coñecían de antemán a convocatoria pública de boicot e a ocupación anunciada. A pesar diso, omitiron deliberadamente calquera medida para desaloxar aos ocupantes, restablecer o uso lexítimo do centro e protexer o exercicio de dereitos fundamentais dos membros de VOX.
Cabe destacar que Galiza Nova, organización xuvenil do propio BNG ao que pertence a alcaldesa Goretti Sanmartín, figuraba entre as entidades convocantes do boicot, o que agrava a responsabilidade política e institucional da rexedora.
A denuncia diríxese tamén contra as persoas físicas e xurídicas que organizaron, convocaron, dirixiron e executaron materialmente a ocupación e impediron o acto.
Segundo VOX, os feitos son constitutivos, entre outros, dos seguintes delitos:
- Delito contra o exercicio dos dereitos fundamentais e liberdades públicas (art. 514.4 CP).
- Delito de odio (art. 510.1.a CP).
- Delito de coaccións agravadas por afectar a un dereito fundamental (art. 172.1 CP).
- Delito de desordes públicos (art. 557.1 CP).
- Comisión por omisión (art. 11 CP) e omisión do deber de promover a persecución de delitos (art. 408 CP).
- Agravante de discriminación ideolóxica (art. 22.4° CP).
Para VOX, “a esquerda radical e o separatismo que gobernan Santiago”, amparados polo Goberno de Pedro Sánchez, demostraron unha vez máis que non toleran a disidencia, a igualdade entre españois nin a liberdade, e prefiren a violencia nas rúas, a ocupación de espazos públicos e a intimidación a quen non comulgan coa súa ideoloxía totalitaria. “Queren que Galicia se converta nun coto pechado da esquerda e do nacionalismo excluínte”.
Por iso, a denuncia presentada esixe que se depuren todas as responsabilidades penais e que quen converteu o Concello de Santiago e a Subdelegación do Goberno en cómplices do “fascismo de esquerdas” respondan ante a Xustiza.