Un incendio nun garaxe, situado na Rúa do Pan, na localidade de Carral, mobilizou esta madrugada aos servizos de emerxencia e obrigou, por precaución, ao desaloxo de dous edificios. Afortunadamente, non se rexistraron danos persoais.
O garaxe ardeu case por completo. Arderon un quad e un turismo na súa totalidade. Ademais, outros tres vehículos, dúas motos e un turismo, víronse afectados polas lapas, así como, a estrutura do inmoble.
Nada mais recibir o aviso, desde o Centro Integrado de Atención ás Emerxencias (CIAE) 112 Galicia alertouse aos Bombeiros de Arteixo, á Garda Civil e os efectivos de Protección Civil da localidade. Tamén informaron ao 061-Urxencias Sanitarias, que por fortuna, non foi precisa a súa intervención.
Tras extinguir o incendio, os bombeiros comunicaron ao 112 Galicia que os veciños das vivendas desaloxadas puideron volver ás súas casas con normalidade.