A Biblioteca Rego da Balsa de Carballo acolleu este venres a presentación do libro de Suso de Toro «Descubrindo Ana Pontón». O acto contou coa presenza destes dous protagonistas, pero tamén dunha ampla representación da sociedade carballesa, entre a que se atopaban o alcalde, Evencio Ferrero, o concelleiro e vicepresidente da Deputación da Coruña, Xosé Regueira, e numerosos membros da corporación municipal.
Nesta obra, o escritor Suso de Toro segue os pasos de Ana Pontón, dende a súa infancia até a actualidade, dende aquela nena até esta muller que é observada por moita xente, desvelando a súa personalidade e o seu traballo diario. Trátase do retrato en movemento dunha persoa e dunha personaxe que resultan unha novidade para o noso país. Na súa voz destílanse as experiencias do nacionalismo galego, de xeracións de persoas comprometidas cunha causa que se visibiliza como froito dunha estirpe das mulleres galegas. Esta crónica de Suso de Toro acompaña a ilusión de centos de cidadás e cidadáns que ven en Ana Pontón a líder indiscutible que agarda gobernar Galiza como consecuencia dunha historia de resistencias e de afirmacións de liberdade; esa figura propia dun tempo novo en que as expectativas van da man dunha muller.