- A muller non puido acreditar a tenencia das mercadorías, cuxo valor no mercado ascende a case 5.000 euros
O equipo da Garda Civil do Aeroporto de Alvedro incautou 484 pastillas de Sildenafil-100 e 30 sobres de Durofil-100 líquida que se atopaban no interior da maleta dunha veciña da Coruña, de 36 anos, que chegou nun voo procedente de Madrid en conexión cun voo orixinario de Santo Domingo. A pasaxeira non puido acreditar a tenencia e circulación das mercadorías en Aduanas.
A muller foi detida polos axentes cando estes se atopaban realizando un punto de verificación fiscal para o recoñecemento selectivo de equipaxes de adega. Ao ser requirida a mostrar o contido das súas dúas maletas, a Garda Civil localizou varios vultos de roupa envolta con cinta adhesiva nos que se atopaban as substancias.
O valor aproximado dos produtos no mercado é de 4,700 euros, e a agora detida enfróntase a unha infracción administrativa por contrabando.