- A empresa denunciou o prexuízo causado co descenso de clientes tras a difusión da mensaxe
As mensaxes e audios enviados a través de diferentes plataformas dixitais e/ou redes sociais con datos falsos son o pan de cada día, sobre todo durante esta corentena. A Garda Civil detivo a unha muller de 30 anos en Cieza (Murcia) por difundir a través dunha nota de voz que unha empregada dun supermercado da localidade dera positivo por COVID-19.
A detida, á que se lle imputa un delito de desordes públicas, difundiu esta mensaxe entre os seus contactos creando desconcerto e alarma social entre a poboación de Cieza. As consecuencias desta información tamén fixeron efecto na clientela do local, que descendeu de forma acusada despois de que se difundise a mensaxe. Por iso, a empresa procedeu a realizar unha denuncia ante a Garda Civil polo prexuízo que estaba a supoñer para a compañía.
A detida e as dilixencias practicadas foron postas ao dispor do Xulgado de Instrución de Cieza (Murcia).