- Facéndose pasar por un cargo dun organismo público comunicaba a residencias de anciáns e hospitais datos falsos relacionados coa situación da pandemia
Axentes da Policía Nacional detiveron a un negacionista da Covid-19 por incitación ao odio e á violencia a través das redes sociais. Ademais, facíase pasar por un cargo dun organismo público e realizaba chamadas telefónicas a diferentes residencias de anciáns, hospitais, clubs de fútbol e mesmo medios de comunicación para difundir datos falsos relacionados coa situación da pandemia. Posteriormente divulgaba datos erróneos nunha coñecida rede social chegando a causar un grave perigo para a saúde pública e para a cidadanía.
Para evitar ser detectado polas forzas da orde, conectábase a través de servidores estranxeiros e utilizaba tarxetas SIM doutros países que cambiaba con frecuencia.
Entre as mensaxes que transmitía contra a integridade moral de cargos institucionais e diferentes colectivos os axentes destacaron: “Todo isto solucionaríase cun tiro na caluga a Pedro Sánchez”; “Ao colexio de médicos hai que prenderlle lume e punto. Fillos de puta.”; “Se non tivese pais, hai meses que mataría a un covidiota. Son xente ignorante e mala que merece morrer”.
A operación, coordinada pola Comisaría Xeral de Información, durou varias semanas ata que os axentes puideron localizar e deter, na localidade Cuarte de Huerva, Zaragoza, a un home de 38 anos de idade por un delito de usurpación de funcións públicas, ameazas, incitación ao odio, á violencia e un delito contra a integridade moral a través das redes sociais, así como calumnias contra autoridades e funcionarios públicos.