- Os axentes inspeccionaron o vehículo e atoparon varias doses que se presupoñen son cocaína e heroína
A Garda Civil do Posto de Laxe detivo a unha persoa de Carballo como presunta autora dun delito contra a saúde pública.
Os feitos ocorreron cando axentes da mencionada unidade se fixaron nun vehículo que estaba estacionado en Laxe nunha zona non autorizada.
No turismo atopábanse o condutor e outro individuo, quen recibiu do primeiro un pequeno envoltorio. Ao decatarse da presenza dos gardas, o condutor escondeu un obxecto debaixo do seu asento, motivo polo cal os axentes decidiron inspeccionar o vehículo.
Durante a inspección, a Garda Civil incautou 26 paquetes dunha cor marrón que se corresponderían con heroína e 18 paquetes dunha substancia branca, supostamente cocaína. Ademais, tamén atoparon 730 euros en moeda fraccionada.
O detido, xunto cos efectos incautados e as actuacións realizadas, foi posto ao dispor do Xulgado de Instrución de garda de Carballo.